Dáiddavuđot doaibma doarju davvi servošiid rievdama deaivideamis
Lappi universitehta dáidagiid dieđagotti Rievdan – Muutos -prošeakta ovddida searvvušlaš dáiddabajásgeassima vugiid máŋggakultuvrrat servošiin Sámis. Dáiddavuđot doaibmadutkamuš vulggii johtui miessemánus Kárášjogas Norggas ja Vuohčus Suoma Sámis dáiddabájiiguin, main huksejuvvui vuođđu boahttevaš jagiid ovttasbargui. Prošeavtta ruhtada Koneen Säätiö (Kone foanda).

Rievdan – Muutos -prošeavtta vuosttaš bargobájiin Kárášjogas ja Vuohčus oassálastit barge kárttaiguin, koarttaiguin ja govvabingoin, go suokkardalle alcceset ráhkis báikkiid. Kártta ala biddjon govat bokte ságastallama. Vuohču skuvlla buot oahppit oassálaste bargobájiide. Govva: Mirja Hiltunen.
Lappi universitehta dáidagiid dieđagotti ollašuhttin Rievdan – Muutos -prošeakta lea dáiddavuđot doaibmadutkamuš, mii ovddida searvvušlaš dáiddabajásgeassima vugiid máŋggakultuvrrat servošiin Sámis. Doaibmadutkamušas ordnejuvvojit dáiddavuđot bargobájit ja dáhpáhusat, mat čohkkejit oktii bearrašiid, boarrásiid, nuoraid ja skuvlalaččaid gieđahallat rievdama fáttáid. Bargobájit ollašuhttojuvvojit guovtti báikegottis Sámis: Kárášjogas Norggas ja Vuohčus Suomas. Guovddážis dán doaimmas lea báikegottiid gaskasaš vuorrováikkuhus.
Vuosttaš dáiddabargobájit ordnejuvvojedje miessemánus, ja dain bájiin Kárášjoga ja Vuohču skuvllaid oahppit, boarrásat ja eará olbmot bukte ovdan jurdagiiddiset rievdama mearkkašumiin ja váikkuhusain. Prošeavtta čuovvovaš muttuin suokkardallot dáiddavuđot vugiiguin maiddái guovllu ássiid iežaset vejolašvuođat váikkuhit dasa man guvlui rievdan dáhpáhuvvá. Jođánis nuppástusat váikkuhit eandalii eamiálbmotkultuvrraide, earet eará árbevirolaš ealáhusaide ja jurdagiidda boahttevuođa birra.

Skuvlalaččat ráhkadeame koarttaid, mat govvidit sidjiide dehálaš báikkiid. Govva: Mirja Hiltunen.
Golmmajahkásaš prošeavtta ovdánettiin dan proseassain ja buktosiin ráhkaduvvo oktasaš dáiddačájáhus Kárášjohkii Sámi Dáiddaguovddážii (SDG) ja Anárii Sámekulturguovddáš Sajosii. Bohtosat buktojuvvojit ovdan maiddái virtuálapublikašuvnnas, dutkanartihkkaliin ja dieđalaš konferánssain. Prošeakta ovddida seammás maid ođasmahtti árktalaš dáiddabajásgeassima Lappi universitehta dáidagiid dieđagottis.
Prošeavtta ruhtada Koneen Säätiö (Kone foanda), ja dan jođiha govvadáiddabajásgeassima professor Mirja Hiltunen Lappi universitehta dáidagiid dieđagottis. Prošeavtta prošeaktadutkin ja koordináhtorin doaibmá Korinna Korsström-Magga ja dutkanassisteantan Ante Jalvela.

Oahppit bargame studios Kárášjogas Ante Jalvela oahpisteamis. Govva: Mirja Hiltunen.
Lassedieđut:
Govvadáiddabajásgeassima professor Mirja Hiltunen, prošeavtta jođiheaddji
mirja.hiltunen (at) ulapland.fi
Tel. +358 40 484 4373
Korinna Korsström-Magga, prošeavtta prošeaktadutki ja koordináhtor
kkorsstr (at) ulapland.fi
Tel. +358 40 574 98 75
Rievdan – Muutos -prošeavtta blogga (eaŋgalsgillii)
Rievdan – Muutos -prošeavtta dieđut Koneen Säätiö siidduin
|