Eamiálbmotmátkeealáhuskonfereansa EITC 2025 Anáris 20.−22.5.2025 - fáddán ehtalaččat suvdilis eamiálbmotmátkeealáhus
World Indigenous Tourism Alliance (WINTA), Sámediggi ja Lappi universitehta ordnejit miessemánus Eurohpa eamiálbmotmátkeealáhuskonfereanssa EITC 2025. Konfereansa ordnejuvvo vuosttas háve Eurohpas. Oassálastit sáhttá báikki alde ja gáiddusin.
Ordnemiid koordinerejeaddji Lappi universitehtalektor Monika Lüthje muitala, ahte báikki ala vuordit oktiibuot sullii 200 oassálasti, geain eatnašat bohtet Sámis. Lühtje roahkasmahttá buohkaid searvat, geaid fáddá beroštahttá.
– Konfereansa fállá erenoamáš dilálašvuođa oažžut ođđa oaidninoaidninvugiid vásttolaš, ehtalaččat suvdilis mátkeealáhusdoibmii, juohkit ja gullat vásáhusaid ja fierpmáiduvvat riikkaidgaskasaččat, Lüthje muitala.
Maŋŋebárgga 20.5. dutkansymposiuma fáddán leat mátkeealáhus ja eamiálbmogiid kulturárbi. Váldohállin lea Lappi universitehta dutkidoavttir Áile Aikio. Beaivvi eará sáhkavuoruin oahpásmuvvat Sámeeatnama lassin Austrália, Alaska ja Kanáda diliide. Sámedujiid ovdanbukti bargobájiin, mat ordnejuvvojit beaivvi áigge, sáhttá duddjot boahkána dahje sisttis čoavddabátti. Beaivvi loahpaha Máhtut-prošeavtta ordnen sápmelaš málestanbargobádji, man dollaba gievkkanmeašttir Heikki Nikula ja árbebiebmočeahppi Maarit Länsman.
Gaskavahko 21.5. ja duorastaga 22.5. konfereanssas gieđahallat ehtalaččat suvdilis eamiálbmotmátkeealáhusa geavadagaid. Dárkilut fáddán leat mátkeealáhusas ávkinadnojuvvon sertifikáhtat, suvdilis mátkeealáhus ja eamiálbmotmátkeealáhusa vuovdin ja márkanastin. Gaskavahku váldohálli, filbmabagadalli Suvi West suokkardallá, mo vásttolašvuohta ja lobi bivdin gullet su bargui ja mo dat sáhtáše gullat vásttolaš mátkeealáhussii. Gaskavahko ovdanbukto maiddái Sámedikki ráhkadan, ođđa sertifikáhta Suomas doaibmi vásttolaš ja ehtalaččat suvdilis sápmelaš mátkeealáhusfitnodagaide. Lassin gullat vásáhusaid Original Original -sertifikáhtas, mii lea Kanádas geavahusas.
Duorastaga hálliguossin leaba earret eará John Barrett ja Frank Antoine. Barrett lea maorimátkeealáhusa ovdavázzi ja WINTA njunušráđi lahttu ja muitala, maid suvdilvuohta oaivvilda su bearašfitnodahkii Aotearoas. WINTA ságadoalli, mátkeealáhusfitnošeaddji Frank Antoine fas gieđahallá eamiálbmotlaš márkanastima. Beaivvi eará sáhkavuoruin vuodjut mátkeealáhusa ovddideapmái Sámemusea Siiddas ja Kalaallit Nunaatis ja oahpásmuvvat Destination Original Indigenous Tourism:ii (DO-IT), ođđa máilmmiviidosaš eamiálbmotmátkeealáhusa márkanastinorganisašuvdnii. Beaivvi loahpas Máhtut-prošeakta ordne báikkálaš mátkeealáhusfitnošeaddjiide málestanbargobáji, man gievkkanmeašttir Heikki Nikula doallá.
Almmut iežat mielde
Gáiddusin oassálastiide ii leat almmuhanmáksu. Báikki alde oassálastiin berrojuvvo oassálastinmáksu boradangoluid gokčama várás. Báikki alde oassálastit mákset ieža maiddái mátke- ja idjadangoluid. Almmuheapmi konferensii dáppe
Oahpahus- ja kulturministeriija lea mieđihan sierradoarjaga konfereanssa lágideami várás. Suvdilis eamiálbmotmátkeealáhus Davviriikkaid árktalaš guovlluin -prošeakta lea bovden konferensii guossin eamiálbmotmátkeealáhusfitnošeaddjiid Kalaallit Nunaatis, Norggas ja Ruoŧas. Prošeakta nanne suvdilis eamiálbmotmátkeealáhusa ovddideami Davviriikkaid árktalaš guovlluin fierpmáiduvvama ja ovttasbarggu vuođul ja buvttada konfereanssas buohkaide rabas raporta. Prošeavtta ruhtada Davviriikkaid Ministtarráđi árktalaš ovttasbarggu prográmma.
Lassedieđut
EITC 2025 neahttasiiddut: https://matkailu.samediggi.fi/se/bures-boahtin-eurohpa-eamialbmotturismakonferensii-eitc-2025i/
Monika Lüthje, Lappi universitehta
040 484 4198
monika.luthje(at)ulapland.fi
|