Mihtilmas sámedutkamuša girji deattuha sámi máilmmiid máŋggalágášvuođa , The Sámi World – Sámi máilbmi – lea sámedutkamuša mihtilmas girji, mii buktá viidát ovdan áigeguovdilis sámedutkamuša iešguđet guovlluin Sámis. Eaŋgalasgielat girjji leat doaimmahan Lappi universitehta sámedutkamuša professor Sanna Valkonen veahkkálaga dutkiiguin Áile Aikioin, Saara Alakorvain ja Sigga-Marja Maggain. Girjji ráhkadus guorada Áilu Vallen rap-lyrihka.
The Sámi World lea 35 artihkkala čoakkáldatčálus, mii lea almmustuvvan riikkaidgaskasaččat mearkkašahtti dieđagoasttidanlágádus Routledge Worlds-ráiddus.
– Min girji lea oassi goasttidanlágádusa girjeráiddu sierra álbmogiin ja eatnanosiin, muhto mii eat háliidan diktit dan meroštallat menddo ollu maid sámi máilmmis galgá muitalit. Mii baicce attiimet friddjavuođa čálliide. Ozaimet girjái iešguđet fágasurggiid sámedutkiin deavsttaid, main deattuhuvvui sámi geahččanguovlu, muitalit girjji doaimmaheaddjit.
Girji čohkke oktii erenomáš máŋggabealat ja viiddes sámedutkiid joavkku, geaid artihkkalat rahpet oasistis uvssaid sámi máilmmiide. Girjji doaimmaheaddjiid mielde girjjis deattuhuvvo ođđa láhkai sámi máilmmiid máŋggalágášvuohta. Girjji sáhttá lahkonit ovttaskas artihkkaliid bokte dahje hámuhit sámi máilmmiid das šaddi ollisvuođa bokte.
Čoakkáldatčállosa ráhkadus guorada Áilu Valle rap-lyrihka.
– Rap-lyrihka válljen dieđalaš girjji ráhkadusa vuođđun lea ovdamearka sámedutkamuša fágaidrasttideaddji luonddus ja jurddašeamis mii rihkku diehtaga ja dáidaga hárjánuvvon rájáid.
Girji buvttada ođđa dieđalaš dieđu. Dat heive buohkaide sápmelaččain, sámedutkamušas ja eamiálbmotdutkamušas beroštuvvan olbmuide ja vel viidábut daidda, geat – antropologa Thomas Hylland Eriksena sániin – ”ohcet olggosbeassama čuolmmain, maid modeardna lea alcces dagahan”. Eriksen lea čállán girjái loahppasániid.
The Sámi World lea ollašuhttojuvvon Suoma Akademiija (Suomen Akatemia) ja Kone vuođđudusa (Koneen Säätiö) ruhtadan fidnuin, main dárkkoduvvo sápmelaš kulturárbbi ontologalaš politihkka.
Girjji almmustahttindilálašvuohta Anáris čakčamánu álggus – dilálašvuohta streamejuvvo
Geassemánus 2022 almmustahttojuvvon girjji sáhttá diŋgot prentejuvvon girjin ja e-girjin Routledge neahttagávppis. Girjji almmustahttindilálašvuohta lágiduvvo Anáris 8.9.2022 kulturguovddáš Sajosis dii 13.00–16:00. Hybridahápmásaš dilálašvuohta lea rabas buohkaide ja dat dulkojuvvo golmma gillii: suoma-, davvisáme- ja eaŋgalasgillii. Almmustahttindilálašvuohta lea áidnalunddot vejolašvuohta gullat sámedutkiid hállamin sin ođđasamos dutkamušain. Buresboahtin guldalit!
https://us06web.zoom.us/j/81622509793 (Zoom), Webinar ID: 816 2250 9793
Lassedieđut
Áile Aikio, Lappi universitehta, aile.aikio@ulapland.fi, tlf. +358 50 46 515 29
|