Nordplus-ruhtadeapmi sámegiela oahpuid ovddideapmái

Lappi universiteahtta, Ubmi universiteahtta, UiT-Norgga árktalaš universiteahtta ja Helssega universiteahtta ožžo Davviriikkaid Ministtarráđis 75 000 euro ruhtadeami sámegiela oahpuid ovddideapmái jagiide 2023–2025.

Lappi universiteahtta koordinere HEI-SAMI – Sami language in higher education in suburban areas -fitnu (Nordplus Språk), man ulbmilin lea universitehtaid ovttasbarggu sámegiela oahpahusas.
Oktan guovddáš hástalussan lea, ahte mo sámegiela oahpuid sáhtášii ain beaktileabbot fállat gávpotguovlluin.

– Lea dehálaš, ahte sámegiela oahpahusas lea nana ovttasbargu, dasgo resursaváili ja hástalusat leat buohkaide oktasaččat. Fámuid ovttastahttin ja doaimmaid ovddideapmi gávpotguovlluid universitehtaid gaskkas fállá sámegiela oahpahussii ođđa vejolašvuođaid, muitala professor Pigga Keskitalo, fitnu vásttolaš dutki Lappi universitehta bajásgeassindiehtagiid dieđagottis.

Oktasaš dárbbuid ja vásáhusaid vuođul ohcat čovdosiid rávesolbmuid oahpahusa čuolmmaide. Oassin fitnu oasseváldit lágidit bargobájiid sámegiela studeanttaide, oahpaheaddjiide ja dutkiide. Ulbmilin lea ovddidit oahpahusmetodaid, buvttadit ođđa oahppomateriálaid ja gávdnat ođđa vugiid ávkkástallat digiteknologiija.

Fitnu doaibmit čoahkkanit vuosttaš geardde Roavvenjárggas golggotmánus 2023.

Lappi universitehta giellaguovddáš fállá davvisámegiela álgooahpuid, ja Lappi universitehta ja Lappi ámmátallaskuvla fállet ovttas fierpmis 25 oahppočuoggá davvisámegiela siidofágaoahpuid.


Lassedieđut:

Professor Pigga Keskitalo, Lappi universiteahtta
pigga.keskitalo(at)ulapland.fi
040 4844153

Filosofiija doavttir Ilona Kivinen, Helssega universiteahtta
ilona.kivinen(at)helsinki.fi

Várdduo jođiheaddji Christina Storm Mienna, Ubmi universiteahtta
christina.storm.mienna(at)umu.se

Professor Torjer Olsen, UiT-Norgga árktalaš univesiteahtta, Sámi dutkamiid guovddáš
torjer.olsen(at)uit.no