Ođđa antologiija eamiálbmogiid kulturárbbi ehtalaš ja suvdilis digitaliseremis
Lappi universitehta máŋggadieđalaš dutkijoavkku ođđa doaimmahuvvon antologiija buktá ovdan geavadagaid, maid vehkiin eamiálbmogiid kulturárbbi sáhttá digitaliseret ehtalaččat ja vásttolaččat.
Digital Indigenous Cultural Heritage -girji gieđahallá máŋggadieđalaččat eamiálbmogiid kulturárbbi digitaliserema.
Girjji čállit gieđahallet iešguđetge vuogádagaid ja teknologalaš beliid eamiálbmogiid kulturárbbi digitaliseremis geavatlaš ovdamearkkaid bokte. Kulturárbbi suddjema ja kultuvrralaš vuoigatvuođaid gudnejahttima dárbbut leat sohkabuolvvaid gaskasaš dieđuid digitaliseremis guovddáš áššit. Girji lea šaddan Lappi universitehta dieđagottiid gaskasaš ovttasbargun ja prošeakta lea čađahuvvon TRUST-prošeavttas, mii lea ruhtaduvvon universitehta strategalaš ruđain.
– Girji buktá ovdan viidát eamiálbmogiid kulturárbbi olaheami, interaktiivvalašvuođa ja sosiála hábmema vejolašvuođaid digitála áiggis, muitala girjji váldodoaimmaheaddji dutkidoavttir Inker-Anni Linkola-Aikio.
Kulturárbbi digitaliseremii laktásit olu vejolašvuođat muhto maiddái hástalusat.
– Digitaliseren doarju eamiálbmogiid kultuvrraid ealáskahttima ja seailluheami sihke ovddida eamiálbmogiid autonomiija ja kultuvrraid gaskasaš gulahallama. Seammás digitaliseren buktá maiddái ehtalaš ja juridihkalaš hástalusaid, nugo ovdamearkka dihtii materiálaid oamastan- ja hálddašanrivttiid gažaldagaid ja eamiálbmogiid rolla digitaliserenproseassas, deattuha professor Piggá Keskitalo pedagogalaš dieđagottis.
– Dan sivas girjjis buktitge dutkamuša bokte ovdan láhkaásaheami váilivuođaid ja regulerendárbbuid dán suorggis, joatká professor Rosa Ballardini riektediehtagiid dieđagottis.
– Eamiálbmogiid kulturárbái laktáseaddji gažaldagaid dutkamuššii lea hohpolaš dárbu. Ovdamearkka dihtii dahkkivuoigatvuođat vuođđoduvvojit áddejupmái ahte dáiddálaš bargguid dahkki lea olmmoš, muhto dat dulkon ii váldde vuhtii dan ahte digitála áiggis olbmuid duddjon duojit geavahuvvojit oahpahit dahkkojearpmi bargat visuálalaš ovdanbuktimiid, dadjá professor Melanie Sarantou.
Girjji presentere máŋggabealat geahččanguovlluid, maid sáhttet ávkkástallat eamiálbmogiid kulturárbe- ja muitoorganisašuvnnaid áššedovdit, musea- ja arkiivabargit, láhkaásahanáššedovdit, dáiddárat, duojárat, spealloovddideaddjit sihke dáid surggiid dutkit, oahpaheaddjit ja studeanttat.
Girjji almmuhandilálašvuohta 28.11.2024 dii 14.00
Girjji almmuhandilálašvuohta lágiduvvo gáiddusoktavuođaid bokte 28. bv. skábmamánu 2024 dii 14.00–15.30. Dilálašvuođas gullat sáhkavuoruid girjji čalliin. Dilálašvuohta lea eŋgelasgillii ja rabas buohkaide.
Dilálašvuođa prográmma ja liŋka gáiddusoassálastimii
Dieđut girjji birra:
Inker-Anni Linkola-Aikio, Pigga Keskitalo, Rosa Ballardini & Melanie Sarantou (eds.): Digital Indigenous Cultural Heritage. Palgrave Macmillan Cham, 2025. ISBN 978-3-031-76940-5 (hardcover), ISBN 978-3-031-76941-2 (e-book)
Girji lea oažžumis ođđajagimánu loahpas 2025. Girjji neahttasiidu olggosaddi siiddus: https://link.springer.com/book/9783031769405
Girji lea buvttaduvvon "PromoTing Sustainable PRactices for Digitalizing IndigenoUS CulTural Heritage – Global North and South Juxtaposed (TRUST)" fidnus Lappi universiteahtta strategalaš ruhtademiin. Dutkit bajásgeassima, riektediehtagiid ja dáidaga ja hábmema dieđagottiin leat searvan fidnui. Professor Pigga Keskitalo lea leamaš bajásgeassindiehtagiid dutkanoasi jođiheaddji, professor Rosa Ballardini lea jođihan olles fitnu ja doaibman riektedieđalaṣ̌ dutkama jođiheaddjin ja professor Melanie Sarantou lea jođihan dáidaga ja hábmema dieđagottis čađahuvvon dutkama.
Lassedieđut:
GIrjji váldodoaimmaheaddji, dutkidoavttir
Inker-Anni Linkola-Aikio, ovdanamma.sohkanamma(at)ulapland.fi
|