Pigga Keskitalo lea válljejuvvon bajásgeassindiehtagiid, erenomážit árktalaš skuvlengažaldagaid professoran
PhD Pigga Keskitalo bargagoahtá borgemánus bajásgeassindiehtagiid, erenomážit árktalaš skuvlengažaldagaid professoran bajásgeassindiehtagiid dieđagottis Lappi universitehtas. Su bargogovvii gullá erenomážit dutkanfitnuid ruhtademiid skáhppon, fitnuid ollašuhttin ja riikkaidgaskasaš dutkanovttasbarggu ovddideapmi.
Pigga Keskitalo. Govva: Kimmo Pallari, Roifoto
Keskitalo lea doaibman jagi 2019 rájes universitehtadutkin Lappi universitehta bajásgeassindiehtagiid dieđagottis, gosa son sirdášuvai oahpaheaddjeskuvlejumi veahkkeprofessora virggis Sámi allaskuvllas. Keskitalo lea nákkáhallan bajásgeassindiehtagiid doavttirin Lappi universitehtas jagi 2010. Sus lea luohkáoahpaheaddji ja sámegiela oahpaheaddji gelbbolašvuohta ja fidnopedagogihka magisttardutkkus Oulu ámmátallaskuvllas. Keskitalo lea bajásgeassindiehtagiid doseanta Helssega universitehtas ja Turku Migration Institute fierpmádatdutki.
Árktalaš skuvlengažaldagaide gullevaš professoráhta laktasa Lappi allaoahpahusakonsortiuma strategiija ollašuhttimii nu globála árktalaš ovddasvástadusa go boahttevuođa bálvalusaid ja guhkesmátkkiid hálddašeami surggiin. Bajásgeassindiehtagiid dieđagotti oaidninvuogis professoráhta lea mearkkašahtti erenomážit Uarctic temáhtahtalaš ”Teacher Education for Social Justice and Diversity” - ja Arctic Five in Education -fierpmádagaid doaimmaid nannemis.
– Árktalaš guovlluin dáhpáhuvvet ollesáigge vuordemeahttunge rievdadusat. Lassin guhkes mátkkit, rievddadalli dilit ja guovlluid iešvuođat ásahit bajásgeassimii ja skuvlejupmái vuordámušaid. Dán galgá váldit vuhtii, ja nu láhčit mánáide ja nuoraide, bearrašiidda ja buot davvi olbmuide buori dili orrut, studeret, bargat ja váldit oahpu, Keskitalo ákkastallá.
Keskitalo deattuha, ahte fátmmasteaddji jurddašeapmi ja áiggi ja báikki mearkkašumi áddejupmi leat dehálaččat, go oahpaheaddjit skuvlejuvvojit ja lágiduvvo oahppu mánáide ja nuoraide.
– Mu ulbmilin lea nannet ipmárdusa iešguđetlágan logihkain, mat váikkuhit bajásgeassimis ja skuvlejumis. Árktalaš guovlluin orrot olu iešguđetlágan eamiálbmogat ja eamiálbmotgielaid hállit. Olbmuid gaskasaš ipmárdusa lasiheapmi ja deaivvadeapmi ja nuppe dáfus áitojuvvon gielaid ealáskahttin leat áigeguovdilis fáttát, mat dárbbašit eambo fuomášumi dilis, mii lea šaddan ovddibu máŋggabealageabbon.
Keskitalo dutkanbarggut leat guoskkahan viidát skuvlejumi árktalaš guovlluin, ceavzilis ovdáneami gažaldagaid ja eamiálbmotskuvlejumi. Dutkanovttasbarggu son lea dahkan birra máilmmi ovdamearkan kanadalaš, USA ja ođđaselándalaš dutkiiguin.
Keskitalo lea vudjon bargokarriára áigge máŋggabealagit sámi bajásgeassima ja skuvlejumi fáttáide ja gáiddusoahpahusa ja oahpahusa digipedagogalaš čovdosiid geavaheapmái oahpahusas. Son lea leamašan fárus máŋggain riikkaidgaskasaš doaimmain nannemin máhttima riikarájáid rastá ja giella- ja kulturdiđolaš oahpaheaddjevuođa ja oahpaheaddjeskuvlejumi fitnuin.
– Háliidan čiekŋudit áddejumi guovlluid historjjáin, dálá diliin ja das, mo skuvlejumi ja oahpahusa galggašii lágidit nu, ahte dat váldá vuhtii guovlluid iešvuođaid ja oahppiid dárbbuid.
Dál Keskitalo barga earret eará Suoma Akatemiija ruhtadan fitnus, mas vuodjut sámegiela gáiddusoahpahusa dutkamii ja ovddideapmái unna mánáid oahpahusa konteavsttas (ADVOST mánáid jietna ja doaibmivuohta – sosiála innovašuvdna unna mánáid oassálastima doarjumis). IPED Indigenous Pedagogy in Teacher Education -fitnu bargobájiin leat smiehtan eamiálbmogiid oahpaheaddjeskuvlejumi dálá dili ja hástalusaid.
Keskitalo lea eret Ohcejogas ja orru dál Eanodaga Bealdovuomis.
Lassedieđut:
Pigga Keskitalo, pigga.keskitalo(at)ulapland.fi, +358 40 484 4153
Oahpásmuva Pigga Keskitalo dutkiprofiilii
|