Sámegiela sajádat ja davviriikalaš oahpahusovttasbargu ovddiduvvo oahpahusministeriija ruhtademiin
Oulu universiteahta Giellagas-instituhtta oaččui jagi 2024 loahpas ruhtadeami oahpahus- ja kulturministeriijas sámegielat allaoahpahusa ovddideapmái. Ruhtadeami vehkiin lea ulbmilin nannet davviriikalaš sámegielat allaoahpahusa oahpaheaddjiid ovttasbargu ja hukset oahpahuspilohtaid. Lappi universiteahtta vástida fitnus erenomážit pedagogalaš áššedovdamušas ja luohkáoahpaheaddjiskuvlejumis.
Ruhtadeami vehkiin Giellagas-instituhtta čađaha jagiin 2025–2027 fitnu, man ulbmilin lea nannet sámegiela sajádaga Davviriikkain. Fitnus vuođđuduvvo oahpaheaddjiid fierbmádat, mii vástida resursaváilái mii lea oahpis buot sámegielaid oahpahussii ja sámegielat oahpaheaddjeskuvlejupmái. Ovttasbargu dahká vejolažžan ođđa doaibmamálliid ovddideami ja dieđu juohki Davviriikkain. Oahpahusministeriija ruhtadeapmi lea 328 860 euro.
Fitnu jođiha Oulu universitehta Giellagas-insituhtta ja eará ovttasbargoguoimmit leat Lappi universiteahtta, Norgga Árktalaš universiteahtta ja Sámi allaskuvla. Skuvlenpolitihkalaš gažaldagain fitnu doarju Suoma sámediggi. Fárus lea pilohtaid čađaheamis maiddái Sámi oahpahusguovddáš.
Oahpahusovttasbarggu piloteren ja digitála oahppanbirrasat
Fitnu deháleamos ulbmilin lea sámegielat oahpahusovttasbarggu piloteren ja oahpahusa ollašuhttin digitála doaibmabirrasiin.
– Áitatvuloš sámegielaid oahpahusa iešvuođat hástet ovddidit iešguđetlágan sámegielaid lohkama ja čállima oahpahusa erenomášpedagogalaš vugiid ja oahppomateriálaid. Ulbmilin leage nannet ovttas eará universitehtaiguin sámegiela oahpaheaddjiid fierpmádaga, mii čohkke vásáhusaid oktasaš oahppoollisvuođaid plánemis ja čađaheamis, Oulu universitehta Giellagas-instituhta jođiheaddji Sigga-Marja Magga muitala.
Fitnus piloterejuvvo sámegiella nubbin- ja vierisgiellan -didaktihka 15 oahppočuoggá ollisvuohta. Oahpahuspilohtta lea oaivvilduvvon sámegielaid ávnnasoahpaheaddjiide, sámegielat luohkáoahpaheaddjiide ja oahpaheaddjestudeanttaide Davviriikkain. Oahpahus ollašuhtto máŋggahámát fierbmeoahpahussan, mii heive oktasaš davviriikalaš skuvlejupmái. Suomas oahpahuspilohtta laktojuvvo oassin rabas skuvlejupmi fálaldagaid ja ollisvuohta fállo maiddái ámmátallaskuvllaid studeanttaide.
Oahpahuspilohtta fállá vejolašvuođa ovddidit digitála oahppanbirrasiid ja fierpmis čađahuvvon oahpahusovttasbarggu. Seammás sáhttit árvvoštallat, makkár gievrras ja heajos bealit leat neahtas fállon sámegiela skuvlejumis.
Lappi universitehta pedagogalaš áššedovdamuš
Lappi universitehta bajásgeassindiehtagiid dieđagotti rollan fitnus lea fállat pedagogalaš áššedovdamuša erenomážit luohkáoahpaheaddjeskuvlejumi ektui.
– Mii vuodjut dievasmahttinskuvlemis ja luohkáoahpaheaddjeoahpus ereonmážit digitála oahppanbirrasiid ja ereonmášpedagogalaš sisdoaluid ovddideapmái, professor Pigga Keskitalo muitala.
Fitnus čohkkejuvvon vásáhusain čállo dieđalaš artihkal, mii lasiha ipmárdusa sámegielat allaoahpahusa nanu beliin ja hástalusain. Ulbmiliin lea maid nannet sámegielaid ja ealaskahttit eará ruoktoriikka vehádatgielaid allaoahpahusa skuvlejumi vehkiin.
Lassedieđut
Jođiheaddji Sigga-Marja Magga
Giellagas-instituhtta, Oulu universiteahtta
sigga-marja.magga(at)oulu.fi
tel. 050 5685326
Professor Pigga Keskitalo
Lappi universiteahtta
pigga.keskitalo(at)ulapland.fi
tel. 040 484 4153
|