Álgoálbmogiid ekologálaš árbedieðu berre seailluhit boahttevaš sohkabuolvvaide
Lappi universitehta aiddo olggosaddán Ekologálaš Árbedieðu Giehtagirji oahpista girjji lohkki ekologálaš árbedieðu sierra oassesurggiide, árbedieðu seailluheami hástalusaide ja vejolašvuoðaide bissovaš ovdáneami ovddideamis. Giehtagirjji leaba čállán dutki Inkeri Markkula ja seniordutki Elina Helander-Renvall Lappi universitehta Árktalaš guovddáǯis.
Giehtagirji lea oassin ”Ekologálaš Árbediehtu Suoma Sámis” prošeavttas, man ulbmilin lea ovddidit sámiid ekologálaš árbedieðu seailuma Suoma Sámi guovlluin. Prošeavtta lea Lappi lihttu ruhtadan Eurohpa guovlluovddidan ruhtaráju (EAKR) olis.
”Ekologálaš Árbediehtu lea doaba, mii govve álgoálbmogiid lundui ja kultuvrii guoski diehtinortnega.
Dát diehtu lea geavatlaš ja dat árbašuvvá árbediehtun buolvvas bulvii. Dakkár diehtu, mii lea laktašuvvan birrasii ja luondduealáhusaide, lea vára vuolde jávkat johtilit rievdaduvvi máilmmis”, muitala seniordutki Elina Helander-Renvall.
Ovttasduvvon Nášuvnnaid luonddu diversitehttii guoski soahpamuš geatnegahttá Suoma soahpamuša vuolláičálli riikan suodjalit ja seailluhit maid sápmelaččaid ekologálaš diehtima.
Ekologálaš Árbedieðu Giehtagirji lea gávdnamis omd. Árktalaš guovddáǯa girjerádjosis Arktikum-viesus ja elektronálaš hámis čujuhusas: http://urn.fi/URN:ISBN:978-952-484-798-8.
Lassidieðut:
seniordutki Elina Helander-Renvall
tel. 040 013 8878
elina.helander-renvall@ulapland.fi
|